واٹس ایپ نے اپنے پلیٹ فارم پر اب چار کی بجائے آٹھ افراد کے درمیان ویڈیو کالنگ یا کانفرنس کا آپشن پیش کردیا ہے۔

اس سے قبل واٹس ایپ اور فیس بک کے سی ای او مارک زکربرگ نے گزشتہ ہفتے اس کی آزمائش کی تھی جس کےبعد باضابطہ طور پر واٹس ایپ ویڈیو میں ایک وقت میں شرکا کی تعداد 8 کردی گئی ہے۔

واٹس ایپ کے مطابق کووڈ 19 کی عالمی وبا کے باعث دوست، عزیز اور قرابت دار ایک دوسرے سے دور ہیں اور اس کے بعد واٹس ایپ پر وائس اور ویڈیو کال میں تیزی آئی ہے۔ اس ضمن میں گروپ کالنگ بہت مفید ہے کیونکہ ایک وقت میں بہت سے لوگ باہم مل کر بات چیت کرسکتے ہیں۔ اسی وجہ سے اب شرکا کی تعداد بڑھا کر 8 تک کردی گئی ہے۔

واٹس ایپ کے مطابق عین پیغامات کی طرح ویڈیو کالنگ اور کانفرنس میں بھی ایک سرے سے دوسرے سرے تک مکمل انکریپشن کو یقینی بنایا گیا ہے۔ واٹس ایپ کے صارفین اب ترقی پذیر ممالک سے بھی تعلق رکھتے ہیں جو ارزاں طریقے سے ایک دوسرے سے رابطہ کرنا چاہتے ہیں۔

قرنطینہ کے دوران دنیا بھر میں واٹس ایپ ویڈیو کالنگ میں صارفین کی جانب سے اضافہ ہوتا جارہا ہےاور اسی کے پیشِ نظر اب واٹس ایپ میں ان ویڈیو کالر کی تعداد بڑھادی گئی ہے۔ بعض اعدادوشمار کے مطابق واٹس ایپ کالنگ میں 10 گنا اضافہ ہوا ہے۔

تاہم واٹس ایپ کی اس سہولت کے لیے ایپ کا نیا ورژن انسٹال کرنا ہوگا۔

The post اب واٹس ایپ پر ایک وقت میں 8 افراد ویڈیو کانفرنس کرسکتے ہیں appeared first on Hum Pakistan.

دنیا کے دیگر ممالک کے طرح خود امریکا نے بھی چاند کی دوبارہ تسخیر میں گہری دلچسپی لینا شروع کردی ہے اور اس کے تحت آرتیمس نامی پروجیکٹ شروع کیا ہے۔ اب تازہ خبر یہ ہے کہ ناسا نے تین خلائی گاڑیوں کی حتمی منظوری دیدی ہے جو انسان کو چاند تک لے جائیں گے۔

ناسا کے اعلامئے کے مطابق بلیو اوریجن، ڈائنیٹکس اور اسپیس ایکس کمپنیاں یہ سواریاں بنائیں گی اور اس کے لیے مجموعی طور پر 967 ملین ڈالر کی خطیر رقم دی جائے گی ۔ اس رقم سے یہ تینوں کمپنیاں قمری لینڈر بنائیں گی۔

اس کے بعد ہر کمپنی اپنی سواری خود تیار کرے گی۔ بلیو اوریجن کمپنی یا تو اپنے نیوگلین راکٹ سے اسے چاند پر بھیجے گی یا پھر یونائیٹڈ الائنس ولکن راکٹ پر رکھ کر لینڈر کو قمر پر اتارے گی۔

تاہم ڈائناٹیکس کمپنی اپنے لینڈر کو ولکن راکٹ کے ذریعے چاند پر پہنچائے گی۔ اسپیس ایکس کمپنی معاہدے کے تحت اسٹارشپ خلائی جہاز بنا کر اسے اپنی ہی کمپنی کے سپر ہیوی راکٹ کے ذریعے چاند پر پہنچا ئے گی۔

ناسا کی ماہر لیزا واٹسن مورگن نے بتایا کہ ہم امریکی صنعتوں کی افادیت دیکھنا چاہتے ہیں کہ آخر وہ کس طرح اس مقصد کو ممکمن بناتی ہیں۔

تاہم یاد رہے کہ تینوں کمپنیوں کی ٹیکنالوجی اور اختراعات بھی مختلف ہیں۔ بلیو اوریجن کے لینڈر کے تین حصے ہیں۔ اس میں چاند کے نچلے مدار سے لینڈر کو نیچے اتارا جائے گا۔ اس کے بعد مزید دو مراحل ہیں جن سے یہ مشن واپس آئے گا۔ لیکن ڈائناٹیکس اور اسپیس ایکس کی ٹیکنالوجی میں ایک ہی جست میں خلائی گاڑی کو چاند پر اتارنے، واپس اڑانے اور زمین تک لانے کا مکمل انتظام کیا گیا ہے۔ لیکن اب بھی ان ساری ٹیکنالوجی کو اپنی افادیت ثابت کرنا ہوگی۔

ناسا نے چاند تک رسائی کے اس مشن کو آرتیمس کا نام دیا ہے جس کے تحت پہلا مسافر 2024 تک چاند پر اتارا جائے گا۔ اس مںصوبے میں ایک گاڑی یا لینڈر کو مرکزی حیثیت حاصل ہوگی جبکہ دو لینڈر اضافی مشن انجام دیں گے۔

The post ناسا نے انسانوں کو چاند تک لے جانے والی تین خلائی سواریوں کا انتخاب کرلیا appeared first on Hum Pakistan.

انسان اور برقی مشینوں کے درمیان رابطوں کو مزید سہل بنانے کی ایک امید افزا خبر امریکا سے آئی ہے جہاں ایک نئے مٹیریل کو ہاتھوں پر پہن کر اسے طبی استعمال یا ویڈیو گیم کھیلنے کے لیے استعمال کیا جاسکتا ہے۔

نارتھ کیرولائنا اسٹیٹ یونیورسٹی کے سائنسدانوں نے ایک بہت باریک، لچکدار اور پہننے کے قابل آستین کا حصہ بنایا ہے جو نہ صرف جلد پر بھاری نہیں پڑتا بلکہ اسے لباس کی طرح پہن کر سویا بھی جاسکتا ہے کیونکہ اس کے نیچے جلد تک ہوا پہنچتی رہتی ہے جو اسے ’قابلِ تنفس لباس‘ یا بریدایبل ڈریس بناتا ہے۔

ابتدائی طور پر اس کی بدولت ٹیٹرس جیسا سادہ ویڈیو گیم کھیلنے کا عملی مظاہرہ کیا گیا ہے۔ لیکن اس کے لاتعداد استعمالات ہیں جس میں مریض کی مسلسل نگہداشت، بایو میڈیکل سینسر اور دیگر استعمال شامل ہیں۔  جامعہ کے پروفیسر یونگ زو اور ان کی ٹیم نے اسے تیار کیا ہے۔

پہلے انہوں نے پالیمر کی مدد سے باریک اور لچکدار کپڑا بنایا اور اس میں وقفے وقفے سے ہموار انداز میں سوراخ کئے۔ اب اسے چاندی کے نینوتاروں کے محلول میں ڈبویا گیا اور حرارت پہنچا کر نینو تاروں کو مضبوطی سے چپکایا گیا۔

اس کے بعد صرف چند مائیکرومیٹر باریک پرت تیار ہوگئی جو انسانی جلد سے اچھی طرح چپکنے لگی اور اس طرح جسم کے اندرونی کیفیت کو بھی اچھی طرح سے نوٹ کیا جاسکتا ہے اور اسے طبی مقاصد کے آسانی سے استعمال کیا جاسکتا ہے۔

اپنی باریکی کی بنا پر یہ پسینے اور گرد سے خراب نہیں ہوتا اور اسے طویل مدت کے لیے زیب تن کیا جاسکتا ہے۔ برقی طور پر اس میں نوائز یا شور کی شرح بہت کم ہے اور کسی پیچیدگی کی وجہ بھی نہیں بنتا ہے۔

اس کے بعد ماہرین نے برقی آستین پہن کر ویڈیو گیم کھیلا جسے اوپر ویڈیو میں بھی دیکھا جاسکتا ہے۔ اگلے مرحلے میں اسے مزید بہتر بنا کر طبی مقاصد کے لیے تیار کیا جائے گا۔ اس کی تحقیق اے سی ایس نینو نامی جرنل میں شائع ہوئی ہے۔

The post مختلف استعمال کے لیے الیکٹرانک سرکٹ کا لباس تیار appeared first on Hum Pakistan.

اس سے قبل ڈرون کو آنکھوں کے اشارے اور دماغی سگنلز سے کنٹرول کرنے کے کئی تجربات ہوچکے ہیں اور اب تازہ خبر یہ ہے کہ ایم آئی ٹی کے انجینیئروں نے ہاتھوں کی جنبش اور پٹھوں کے سگنل سے ڈرون کنٹرول کرنے کا کامیاب مظاہرہ کیا ہے۔

اس تجرباتی سسٹم کو ’کنڈکٹ اے بوٹ‘ کا نام دیا گیا ہےجس میں (برقی سرگرمی نوٹ کرنے والے) الیکٹرومایوگرافی نظام اور حرکت محسوس کرنے والے موشن سینسر استعمال کئے گئے ہیں۔ تجرباتی طور پر انہیں  سیدھے ہاتھ  کی اوپری مچھلی (بائسیپ) نچلے پٹھے (ٹرائی سیپ) اور نچلے بازو پر لگایا گیا ہے۔ سارے سینسر ایک ساتھ ملکر بازو کی حرکت اور بازو کے سگنل کو پڑھتے رہتے ہیں جس کا ڈیٹا مائیکروپروسیسر تک جاتا ہے۔

پروسیسر میں مشین لرننگ الگورتھم شامل کیا گیا ہے جو بازو کے سگنل اور مختلف حرکات کو دیکھتے ہوئے ان کو ڈرون کے لیے احکامات میں بدلتا ہے۔ یہ ہدایات وائرلیس کے ذریعے چار پر والے ڈرون تک پہنچتی ہے اور اس کے لحاظ سے عمل کرتا ہے۔

اس کے بعد ڈرون پٹھے کے اشاروں کو بھی سمجھتے ہوئے ازخود ان کی مطابقت میں آجاتا ہے۔ اب اگر بازو کے اوپری حصے کو سخت کردیا جائے تو ڈرون رک جائے گا۔ مٹھی کو زور سے بند کرنے پر ڈرون آگے جاتا ہے۔ مٹھی کو گھڑی وار اور گھڑی کی سمت کے خلاف گھمایا جائے تو وہ دائیں اور بائیں گھومتا ہے۔ اگر مٹھی کو دائیں بائیِں، اوپر اور نیچے گھمایا جائے تو ڈرون بھی دائیں اور بائیں یا اوپر اور نیچے ہوجاتا ہے۔ اس طریقے سے ڈرون نے مجموعی طور پر 1500 اشاروں کو 82 فیصد درستگی سے سمجھا اور عمل کیا۔

اس ٹیکنالوجی میں کسی بھی ڈرون کو آسانی سے استعمال کیا جاسکتا ہے اور ہر نئے شخص کے لیے نظام کو ٹریننگ دینے کی کوئی ضرورت پیش نہیں آسکتی۔ اس طریقے سے بوڑھے اور معذور افراد کے لیے مددگار روبوٹ بنانے کی راہ ہموار ہوگی۔

اس پر کام کرنے والے مرکزی محقق جوزف ڈیل پریٹو کہتے ہیں کہ ڈرون نظام کو مزید مؤثر بنانے پر کام جاری ہے اور جلد ہی اس ٹیکنالوجی سے عام لوگ بھی فائدہ اٹھاسکیں گے۔

The post انسانی پٹھوں سے ڈرون کنٹرول کرنے کا کامیاب مظاہرہ appeared first on Hum Pakistan.

پودوں پر بیماریوں اور حشرات کے فوری حملے کی صورت میں انہیں بچانے کی کوشش کی جاتی ہے ۔ اس کے تحت کبھی کبھی ان پر کیڑے مار ادویہ کا چھڑکاؤ کیا جاتا ہے لیکن وہ پودے کی جڑوں تک نہیں پہنچ پاتا۔ اسی لمبی سوئیوں سے بھی دوا پودے کی گہرائی تک پہنچائی جاتی ہے لیکن وہ بھی کوئی مؤثر طریقہ نہیں۔

میساچیوسیٹس انسٹی ٹیوٹ آف ٹیکنالوجی کے سائنسداں یونٹینگ چیاؤ نے اس مسئلے کو حل کرنے کے لیے خردبینی سوئیوں کا پیوند بنایا ہے۔ اس سے پودے کو دوا یا غذا دینے اور یہاں تک کہ اس کے ڈی این اے میں تبدیلی میں بھی کامیابی ملی ہے۔ سوئیوںکو فائٹوانجیکٹر کا نام دیا گیا ہے جسے ریشم سے اخذ کردہ مٹیریل کے ٹکڑے پر چپکایا گیا ہے۔ جیسے ہی یہ پودے پر لگتا ہے تو اپنی دوا یا غذا اس کے نظام میں داخل کردیتا ہے۔

اسوقت امریکا میں ہی سٹرس گریننگ کا مرض پھیلا ہوا ہے جس سےاربوں ڈالر کا نقصان ہوچکا ہے۔ دوسری جانب زیتون اورکیلے کی فصلوں میں بھی ایسے مسائل آتے رہتے ہیں۔ یہی وجہ ہے کہ مائیکروانجیکشن سے ایسی بیماریوں کو دور کیا جاسکتا ہے۔

اس کاوش میں سوئی سے زیادہ اسے تھامنے والا مٹیریل بنانا مشکل تھا جس کا حل ریشمی پارچے کی صورت میں سامنے آیا اور اسے خصوصی طور پر ڈیزائن کیا گیا تھا۔ اسے ٹماٹر اور تمباکو کے پودوں پر آزمایا گیا تو بہترین نتائج برآمد ہوئے۔ اندر جانے والی دوا پتوں سے لے کر جڑوں تک میں پہنچنے لگی۔ دوا کی تصدیق خاص روشن ہونے والے کیمیکل سے کی گئی جو دوا میں شامل کیا گیا تھا۔

لیکن اب اس نظام کو تجارتی پیمانے پر بنانا ایک بڑا چیلنج ہے کیونکہ تجربہ گاہ میں مؤثر ہونے کے باوجود بھی بیرونی ماحول میں اس کی آزمائش بہت ضروری ہے۔

The post پودوں کو جان بچانے والی دوائیں دینے کا کامیاب طریقہ وضع کرلیا گیا appeared first on Hum Pakistan.

ہم نیوز کے مطابق کورونا وائرس سے بچاؤ کی جو ویکسین تیار کی گئی ہے اس کا ہیومن ٹرائل چین اور پاکستان میں ایک ساتھ شروع کیا جائے گا۔

چین میں ویکسین کی تیاری کی تصدیق ایگزیکٹو ڈائریکٹرنیشنل انسٹی ٹیوٹ آف ہیلتھ ڈاکٹرعامراکرام نے بھی کردی ہے۔

ڈاکٹرعامراکرام کے مطابق ہیومین کلنیکل ٹرائل کے لیے تیار کی جانے والی ویکسین چین فوری طور پرپاکستان کو فراہم کرے گا۔

ہم نیوز کے مطابق کورونا وائرس سے بچاؤ کے لیے تیار کی جانے والی ویکسین کے متعلق ڈاکٹر عامر اکرام کا کہنا ہے کہ آئندہ تین سے چار ماہ کے دوران ٹرائل مکمل ہونے کے بعد اسے باقاعدہ علاج کے لیے لانچ کردیا جائے گا۔

اس ضمن میں ایگزیکٹو ڈائریکٹرنیشنل انسٹی ٹیوٹ آف ہیلتھ ڈاکٹرعامراکرام کا کہنا ہے کہ پاکستان میں کلینکل ٹرائل شروع کرنے کے لیے صرف ضابطے کی کارروائی مکمل کرنا باقی ہے۔

دلچسپ امر ہے کہ صرف 24 گھنٹے قبل آکسفرڈ یونیورسٹی کی جانب سے اعلان کیا گیا تھا کہ جمعرات سے کورونا وائرس سے نمٹنے کے لیے تیار کی جانے والی ویکسین کا کلینیکل ٹرائل شروع کیا جائے گا۔

برطانوی وزیر صحت نے گزشتہ روز بتایا تھا کہ ویکسین کی تیاری کے لیے آکسفرڈ کی ٹیم کو حکومت دو کروڑ برطانوی پاؤنڈز دے گی۔

عالمی ذرائع ابلاغ کے مطابق اس وقت پوری دنیا میں تقریباً 100 سے زائد لیبارٹریز میں سینکڑوں سائنسدان اور ڈاکٹرز کورونا وائرس سے بچاؤ کی ویکسین تیار کرنے کی کوشش میں مصروف ہیں۔

The post ورونا: چین نے ویکسین کے حوالے سے خوشخبری سنا دی appeared first on Hum Pakistan.

وزیراعظم کی زیرصدارت قومی رابطہ کمیٹی کے اجلاس کے بعد ذرائع ابلاغ کے نمائندوں کو بریفنگ دیتے ہوئے انہوں نے کہا کہ اجلاس میں میڈیا کو درپیش مسائل کے حل پر بات چیت کی گئی۔

معاون خصوصی کا کہنا تھا کہ دنیا بھرمیں سوشل میڈیا تیزی سے ترقی کررہاہے۔ اس حوالے سے وزیراعظم نے یوٹیوب چینل کے حامی صحافیوں سےملاقات کی۔

The post نئی ڈیجیٹل میڈیا اور اشتہارات کی پالیسی لارہے ہیں، معاون خصوصی appeared first on Hum Pakistan.

پینٹا گون کی جاری کی گئی تین ویڈیوزمیں ایسے فضائی اجسام نظر آتے ہیں جن کے متعلق کسی کو علم نہیں کہ یہ کیا ہیں۔

مذکورہ یہ اجسام تیزی سے فضا میں حرکت کرتے ہیں۔ ایک امریکی پائلٹ کا کہنا ہے کہ ایسی رفتار اس نے پہلے کبھی نہیں دیکھی۔

امریکی صدر ڈونلڈ ٹرمپ نے بھی کچھ عرصہ پہلے پہلے ایک انٹرویو میں کہا تھا کہ امریکی پائلٹس نے کچھ غیر معمولی اجسام دیکھے ہیں۔ لوگوں کے خیال میں یہ یو ایف اوز ہیں تاہم  وہ اس پر زیادہ یقین نہیں رکھتے۔

خیال رہے کہ پینٹاگون نے  دو ہزار سات میں ایک خفیہ پروگرام شروع کیا تھا جس کا مقصد  فضا میں نظر آنے والے نامعلوم  اجسام  کے متعلق تحقیق کرنا تھا۔

فنڈز کی قلت کے باعث دو ہزار بارہ میں یہ پروگرام بند کر دیا گیا تھا۔ پروگرام کے سابق انچارج کا کہنا ہے کہ  اس تحقیق کے دوران جو شواہد اس نے دیکھے ان کی بنیاد پر اسے یقین ہے کہ انسان اس کائنات میں تنہا نہیں۔

The post پینٹاگون نے پہلی بار مبینہ اڑن طشتریوں کی ویڈیوز جاری کر دیں appeared first on Hum Pakistan.

دنیا بھر کے ٹوئٹر صارفین کو ایس ایم ایس کے ذریعے فالو کیے گئے اکاؤنٹس کے ٹویٹ 40404 کے نمبر سے موصول ہوتے تھے۔

ٹوئٹر نے گزشتہ سال اعلان کیا تھا کہ کئی ممالک میں سروس کو بند کردیا گیا ہے جب کہ دیگر ممالک میں بھی موبائل پیغامات کا سلسلہ بند کردیا جائے گا۔

کمپنی نے اس ضمن میں مؤقف اختیار کیا ہے کہ صارفین کے اکاؤنٹس کی حفاظت کے پیش نظر ایس ایم ایس سروس بند کرنے کا فیصلہ کیا گیا ہے۔

کمپنی کا کہنا ہے کہ ہیکرز اس سے فائدہ اٹھا سکتے ہیں اورصارفین کی معلومات کا غلط استعمال ہوسکتا ہے۔

ٹوئٹر انتظامیہ کے مطابق ایس ایم ایس سروس بند ہونے کے باوجود صارفین کو اہم پیغامات موبائل پر موصول ہوں گے۔

ایس ایم ایس سروس استعمال کرنے والے لاکھوں ٹویٹر صارفین کے اکاؤنٹس بھی بند کردیے گئے ہیں۔ یہ تمام اکاؤنٹس وہ تھے جو 40404 کے تحت بنائے گئے تھے۔

ٹوئٹر انتظامیہ کے مطابق اُن اکاؤنٹس کو ڈیلیٹ کیا گیا ہے جن سے خطرات لاحق تھے۔

اکاؤنٹس ڈیلیٹ ہونے سے ایسے صارفین کی تعداد بھی بہت ہوگی جن کے فالوورز کم ہو جائیں گے۔

The post ہشیار: ٹوئٹر نے پرانی سروس بند کردی appeared first on Hum Pakistan.

گوگل کے اعلامیہ کے مطابق گوگل میٹ ویڈیو کانفرنسنگ ایپ مخصوص صارفین یکم مئی سے بالکل مفت استعمال کرنے کے مجاز ہوں گے۔ صارفین کے لیے صرف جی میل اکاؤنٹ ضروری ہوگا۔

گوگل کی میٹ ویڈیو کانفرنسنگ ایپ اس سے قبل چھ ڈالرز ماہانہ کی عوض فراہم کی جاتی تھی۔

صارفین کو گوگل کی جانب سے بتایا گیا ہے کہ وہ ویب سائٹ، اینڈرائیڈ یا آئی اوایس اسٹور سے ایپ ڈاؤن لوڈ کر سکتے ہیں۔ میٹ ایپ کےذریعے 100 سے زائد صارفین بیک وقت ویڈیو کانفرنس پر بات کرسکیں گے۔

پہلے مرحلے میں صارفین کو میٹ ایپلی کیشن بالکل مفت فراہم کی جائے گی۔ اس ضمن میں صارفین کو باقاعدہ ای میل کے ذریعے مطلع بھی کیا جائے گا۔

گوگل کو فیس ادا کرنے والے صارفین کے لیے یہ سروس 30 ستمبر تک بالکل مفت کردی گئی ہے۔

گوگل کی پریمیئم سروس استعمال کرنے والے صارفین بیک وقت 250 افراد کو ویڈیو کانفرنس کال میں شامل کرسکتے ہیں۔

کورونا وائرس کے بعد سے سماجی رابطوں کی ویب سائٹس کے استعمال میں بے پناہ اضافہ ہوا ہے۔ اس کے بعد سے مختلف ویب سائٹس صارفین کے لیے روزآنہ اچھی اور معیاری سروس فراہم کرنے کا اعلان کررہی ہیں اور انہیں اپنی جانب متوجہ کرنے کے لیے نت نئے طریقے بھی اپنا رہی ہیں۔

The post گوگل کی جانب سے صارفین کے لیے مفت سروس appeared first on Hum Pakistan.